“Beth rydw i’n ei wneud i ofalu am fy iechyd meddwl”
Mae Lucy, myfyriwr PhD Theatr a Pherfformio yn PDC yn ei thrydedd flwyddyn, yn dweud wrthym sut mae’n gofalu am ei hiechyd meddwl. Gall bod yn ddysgwr o bell fod yn ynysig, ond mae Lucy wedi rhannu ychydig o bethau y mae’n eu gwneud i’w helpu i oresgyn hyn.
Lucy ydw i a dw i newydd ddechrau fy nhrydedd flwyddyn o’m PhD mewn theatr a pherfformio. Dw i’n ymchwilio i brofiad newydd-ddyfodiaid i theatr amatur i ddeall sut mae grwpiau’n rheoli mynediad a chynhwysiant. Yn flaenorol, fe wnes i fy BA ac MA yn PDC, felly dw i wedi bod yma ers tro!
Dw i’n byw yng Nghaerloyw gyda fy ngŵr a’n dwy gath, ac yn gweithio gartref yn bennaf. Dw i’n teithio i Gaerdydd ychydig o weithiau’r flwyddyn i weld fy ngoruchwylwyr ac i ymweld â’r llyfrgell. Gall bod yn ddysgwr o bell fod yn eithaf ynysig, yn enwedig wrth wneud PhD oherwydd ei fod yn brofiad unigryw iawn. Dw i’n mynd i’r afael â hyn trwy fod yn aelod o gymunedau PhD ar-lein lle gallaf gysylltu ag eraill sydd yn yr un cwch â mi. Ar wahân i hynny, mae gweithio o adref yn grêt i mi – dw i’n gallu bod yn hyblyg gyda fy amserlen, cymryd seibiannau pan dw i eu hangen, a gwisgo pyjamas. Os ydych chi’n fyfyriwr PhD sy’n dechrau ar eu taith ymchwil fel dysgwr o bell, fy nghyngor i yw dod o hyd i ddiwrnod gwaith sy’n gweithio i chi – does dim rhaid i chi wneud 9-5! Ceisiwch fynd i’r arfer o gymryd seibiannau rheolaidd, gall fod mor hawdd i gael eich sugno i lawr twll cwningen ymchwil ac anghofio bwyta.
Mae gofalu am fy iechyd meddwl yn bwysig iawn i mi oherwydd mae gen i Anhwylder Personoliaeth Ffiniol. Mae’n salwch meddwl sy’n golygu fy mod weithiau’n cael trafferth ymdopi â bywyd bob dydd mewn ffordd nad yw pobl heb yr anhwylder yn ei deall. Dw i’n gwneud cwpl o bethau i sicrhau fy mod yn cadw’n iach, fel sicrhau fy mod yn cael llawer o gwsg bob nos, bwyta’n iach ond hefyd caniatáu i mi fwynhau bwyd (dydw i byth yn dweud na wrth bwdin!), a sicrhau fy mod yn treulio amser gyda fy ffrindiau a’m teulu tra hefyd yn sicrhau fy mod yn cael digon o amser ar fy mhen fy hun i ddadelfennu pan fo angen. Ond fy hoff beth i ofalu am fy iechyd meddwl yw padlfyrddio. Yng Nghaerloyw mae gennym ni gwpl o afonydd gerllaw, a dw i wrth fy modd yn mynd allan ar fy mwrdd. Mae’r afon mor heddychlon, a dw i’n cael gweld cymaint o fywyd gwyllt. Mae hefyd yn dipyn o ymarfer corff, yn enwedig os ydych chi’n cwympo i mewn!
Mae’n bwysig iawn bod yn onest os ydych chi’n cael trafferth gyda’ch iechyd meddwl. Mae PDC bob amser wedi bod yn gefnogol iawn i mi yn ystod cyfnodau anodd ac mae cyfoeth o gymorth llesiant ar gael i chi os oes ei angen arnoch.
